Tåftaf gi mit nuebi siento sitenta siha na såkkan, i Soka Gakkai na kumunidåt gi uriyan enteru i tano’, ma tånga inetnon entenasionåt para i Soka Gakkai. Gi kinatgan i minakkat na cho’cho’ gine’helo’en i kinalamten ‘Buddhist’ gi difirentes mismo tano’-ñiha, ma aligao para u ma geftungo’ mås put ‘Buddhism’ ya para u ma irensia i taihinilat na espiriton i tumutuhon i inetnon ni’ dos na prisidente as TsuesaburoMakiguchi yan si Josei Toda. Meggai ma diseha na para si Daisaku Ikeda, i tumuka’ i kinalamten i enteru i tano’, u ge’helo’i este u nuebu na inetnon entenasionåt.
Åpmam pinadesen-ñiha i islan Pasifiku siha ginen i inatulaika yan ginanan i pudet entre i fuetsan i Sangkattan yan Sanlichan, ya i islan Guåhan gumogo’te et mås annåko’ na hestorian hinatmen manaotao sanhiying gi Pasifiku. Ginen i inifresen i halom kurason-ña put para ta na’guaha pås gi tano’, ha disidi si Ikeda na Guåhan, i lugåt annai manmachuda’ mala’et na haga’ yan minalingu, et mås maolek na lugåt para u ma estapblisa i inetnon i Soka Gakkai entenasionåt ya ma tutuhon nuebu na hinanao para u ma tulaika i dinesponen i tinaotao.
Ginen gera para pås!
Ginen chinatli’e’ para inatungo’!
Ginen tai’inafa’maolek para inagefli’e’!
—Daisaku Ikeda
Måtto si Daisaku Ikeda para Guåhan ginen Hawaii ya kinembida hålom as Bert Unpingco, i ma’gas Setbisión Bisitan Guåhan. Umali’e’ lokkue’ yan i Maga’låhi as Ricardo Bordallo, ni numa’huyong kinembida para i prisidenten Soka Gakkai, gi tinige’, “Senseru na dinisehå-hu na ginen i sinehyo’-mu na u inayuda numa’hasso enteru i tano’ na i inafa’maolek entre todu i taotao siha gi todu nasión i mismo na manera na siña ta hago’ pås.”
I gipot inafa’maolek ni’ ma go’te gi pupuengi gi iya ‘Rizal Beach Park’ sumilelebra pås yan miklåsi ya gi parehu na tiempo, i inenran i kottura siha entre i Pasifiku. Tåftaf finatto-ña si Daisaku Ikeda para u kombida hålom ya para u gåsta tiempo yan i manmañåsaonao siha na taotaogue.
Gi diha 26 gi Ineru, siento sengkuentai ocho na riprisentånten Soka Gakkai na membro ginen sengkuentai unu na båriu yan tiritoriåt manetnon gi liheng i ‘Guåhan International Trade Center’ para i ‘First World Peace Conference’.
Ha fitma si Daisaku Ikeda i lepblon bisita ya, gi papa’ i lucha para råsa, ha tuge’, “I Tano’,” ginen i hinasson i kinimiten i fafa’na’gue-ña, as Josei Toda, para i minagåhet i si’udadånon enteru i tano’.
Ginen i minigai-ña na bineta, ma apunta gi komferensia para u ge’helo’i i nuebu na ma estapblisan Soka Gakkai Entonasionåt. Manmanohge todu i mañåsaonao para u ma abiba ya u ma na’annok inapreban-ñiha.
Ha gopte si Daisaku Ikeda i dinanña’ para u silebra i ma fotman i Sokka Gakkai Entenasionåt yan para u ma nå’i agradisimento i manakhelo’ siha na pueston taotao kumunidåt put i sinapotten-ñiha yan i amåpblen-ñiha. I Maga’låhen Guåhan as Bordallo ha komplementa si Ikeda kumu ha na’membron “I otden i ansiånu na CHamorain i hagas na islan Guåhan.”
